gu

હા, માં જે ધારે તે કરી શકે

માતૃત્વ શબ્દ સાંભળતા જ મમતાનો અનુભવ થાય. પણ આ માતૃત્વ એ માત્ર નવ મહિનાની લાગણીઓનો અવસર નથી. એક સ્ત્રી જયારે નાનું બાળક હોય છે ત્યારથી જ મા હોય છે. ક્યારેક રમકડાં ની ઢીંગલી પર પ્રેમ વરસાવતી, તો ક્યારેક એના ભાઈ-બહેન પર ,અને ક્યારેક તો એના પિતા પર પણ. આજના વુમન એનપાવરમેન્ટ ના જમાનામાં દરેક સ્ત્રી એ પહેલા તો એ યાદ રાખવાનું છે કે ઉપરવાળા એ તમને સ્ત્રી હોવાનું ગૌરવ પ્રદાન કર્યું છે. સર્જન કરવાની ક્ષમતા આપીને પરમેશ્વરે પોતાની સમોવડી હોવાનો અનુભવ કરાવ્યો છે. એક આત્મા બીજા આત્મા નો અનુભવ કરી શકે, અને એ આત્મા ને શરીર આપી શકે એવું ઔલોકિક કાર્ય માત્ર ભગવાન અને સ્ત્રી જ કરી શકે. ગર્ભ માં વિકસતો આત્મા એ મારુ સંતાન છે , વાહ.. શું અદભુત અનુભૂતિ છે. માતૃત્વ દુનિયાની બધીજ સ્ત્રીઓ માટે એકસરખો આનંદદાયી અનુભવ છે. ભલે એ પછી ધનવાન હોય કે ગરીબ.

શ્રેષ્ઠ, સશક્ત, ગુણવાન અને બુદ્ધિવાન સંતાન વિશ્વ ને ભેટ આપવું એ એક સ્ત્રી ની સૌ થી મોટી ફરજ છે. પ્રાચીન કાળમાં નિર્બળ સંતાન ને જન્મ આપવો એ પાપ ગણાતું હતું.એટલે સંતાન તેજસ્વી, શૂરવીર અને પરાક્રમી આવે એ માટે ગર્ભાવસ્થા દરમ્યાન જ ખાસ પ્રયત્નો કરવામાં આવતા હતા. આજની સ્ત્રી તો ભણેલી, આધુનિક અને પુરુષ સમોવડી છે. આહાર, વિહાર અને વિચારમાં જો સંયમ રાખવામાં આવે અને ચોક્કસ સંસ્કાર નું સિંચન ગર્ભાવસ્થા થી જ કરવામાં આવે તો એ માતા વિશ્વ ને ઉચ્ચકોટી ના સંતાનો ચોક્કસ ભેટ આપી શકે છે.

શ્રી કૃષ્ણ ની વાતો માતા સુભદ્રા ના ગર્ભ જ માં સાંભળી, શીખી અને નાની ઉમર માં જ શું અભિમન્યુ એ ચક્રવ્યૂહ નહોતા વીંધ્યા ? .જો જીજાબાઇ એ સંકલ્પ ન કર્યો હોત કે મારા ગર્ભ માં રહેલું બાળક પરાક્રમી અને શૂરવીર બને, તો શિવાજી જેવા શૂરવીર ભારત દેશ ને ક્યાંથી મળ્યાં હોત ? પુતળીબાઈ ના સંતાન એવા મહાત્મા ગાંધી થી લઇ ને હીરાબા ના સુપુત્ર એવા ભારત ના વર્તમાન પ્રધાનમંત્રી શ્રી નરેન્દ્રભાઈ મોદી સહીત ના મહાન લોકો ના જીવનમાં જો ડોકિયું કરવામાં આવે તો ખ્યાલ આવશે કે એમના જીવનના ઘડતર નો પાયો પણ એમની જનેતાઓએ જ નાખ્યો હતો.

હા, માં તું જે ધારે એ ચોકકસ કરી શકે.

Add a Comment

You must be logged in to post a comment